رسالة شهيد
ليه يا مصر ليه
بتبعينى يا مصر ليه
كنت فاكر انى ابنك
وابنك دة بتخافى عليه
كنت فاكرك صاينة روحى
لما نزلت اهتف ليه
ليه الحق مهوش موجود
وليه الظلم طويلة ايديه
نزلت عشانك وعشان ولادك
اسقط بروحى نظام فسادك
ودمى اللى سال دة كله عشانك
بردو رخصتيه
وبكام الف تمنتيه
وبردو قولت فداكى روحى
وع الجنة يا روحى هتروحى
وحققوا من بعدى اخواتى
اللى كان نفسنا فيه
محينا فسادك
وشيلنا الخوف من قلب ولادك
وروحى اللى راحت يامصر عشانك
حقها رجعتيه؟؟؟
منا كنت فاكر دمى غالى
ع قلب قاضى جبان
جه وقال انتو ظلمتونى
انا ملقتش شهود عيان
قلناله فين المستندات
ولا حتى الفيديوهات
قال دة كله راح وانسو بقا اللى فات
ننسى ايه بس ولا ايه؟؟
يابلدى مبقاش فيكى امان
راحو يشجعوا ماتش الاهلى
رجعوا شهدا ف الاكفان
لا رجع حقهم ولا حتى الامان
وف ماسبيرو ومحمد محمود
لما نزلو ضد العسكر
يهتفو عايزين حمايه ورئيس كمان
دة غير اللى حصل كتير
ميتحكيش ف شعر ولا ف الاساطير
مبقتش عارف ازعل منك
ولا دة ذنب ناس ظلموكى
من رئاسة ومن حكومة
قالو هم هيغيروكى
بس بردو فداكى روحى
اصلك انتى حتة منى
وعمرى كله دة بين ايديكى
شعر هاجر جمال فاروق
مشرف القسم الثقافي : مصطفى الصاوي
نشرها : آسر صالح
مدير المدونة : ماجد عزت
ليست هناك تعليقات:
إرسال تعليق